الشاعر عادل الاسعدي من الشعراء الشباب الذي يكتب الشعر من أجل الشعر ويعتمد في شعره على الاسلوب التصويري وسعة الخيال وله هذه القصيدة التي اطلق عليه (( حقيقة الخيال ))
على ذكرى غرام (ن)زارني بين الكرى والنوم
سنين ليا تحلويت الكرى زارتني حلومه
ليا منّه لفا بين الحقيقه والخيال يحوم
وياخذني عن اضغاث الحلوم بعيد بعلومه
يعاتبني وانا من سبّة فراق الغضي مهموم
ولو يدري عن اللي جوف صدري زادت همومه
يقول انت انت مهمل والغلا يبغا وفا وعزوم
واقول ان النصيب وساعة الاقدار مقسومه
الا ياليتك تثمّن كلامك يالغضي وتشوم
عن التجريح وعروق الغلا فالصدر مكلومه
مشيت بدربك اللي كله اشواك وغثا وسهوم
ونفسي بالغرام وسكتك ماهيب مليومه
وجاوب ياهواي وعشقي الاول ليا اخر يوم
ترفّق يمكن ان اقدارنا بالبعد محسومه
اشوفك بالغرام تطيح مع درب الهوا وتقوم
مناضل ماتفكر فالمحال وهومتك هومه
تراني درةً تبغا من يغوص البحر ويعوم
واخاف انك ليا غصت البحر ماتقدر تعومه
واقول الله يرحم والدينك لاتكثّر لوم
لو انك ذنب مانفسي على لاماك معصومه
انا اشوفك غلاي ودربي لدار الغلا مرسوم
لو العذال كلً يرمي بدربي من سهومه
ماهموني وانا مااقبل على لحظة لقانا سوم
لو ان ابن الجبان تضيق به فالموقف هدومه
تذوقت المراره من طعون الخنجر المسموم
على سبّة فراقك والهجير اومت بي سمومه
لك الله لو رجع عمري ليحصل فالعلوم علوم
لااجيبك والطموح يعاند العالم بمفهومه
ولكن لاتباطاني لو ازعل قوم وارضي قوم
وانا اشوفك ربيع لعمري الباقي ويشمومه
انا ماني من الاصرار والعزم القوي محروم
ولو ان النصيب وساعة الاقدار مقسومه
عادل الاسعدي
